一落公車K11過條馬路已經到咗酒店，但係真正嘅酒店大堂係勁勁勁勁遠！如果睇過上面張官方酒店相，就會知有條好長嘅大道，我未去之前仲以為係假嘅，去到先知原來係真！哥日天氣仲要好好，太陽勁大，行入去都應該要10mins。
其實去到橫琴灣酒店已經14:30，我地即刻去check-in，個職員話未有房，咁只好食完野3點後再返黎。
酒店職員介紹我地去橫琴客運碼頭附近食，但我地唔想再行哥條咁長嘅大道出去，同埋已經好肚餓，所以就留咗起酒店食。隨意入咗間餐廳叫漁港，d餐具都幾靚，個炒飯都叫做有造型嘅，不過味道一般！其實好驚起內地食野，怕唔好食，所以都係正正常常叫左一個飯一個麵，埋單大約RMB￥170，酒店嚟講都正常價。
食完就拎房，今次住嘅喺家庭房，其實一家大細住都幾好可以帶兩個小朋友，間房仲有個露台，張小童雙層床，大人都訓到！
淋浴用品併到張圖出黎，毛巾都幾靚，無論大人細路都會鍾意！
Hea咗陣，我地就搭公車去橫琴客運碼頭覓食，公車K10、K11都可以，到站落車過條橋就係美食城！
我地去到應該大約18:00。其實似一個無人嘅夜市，好多一檔檔小食、有野飲、甜品等等，有d檔係會有枱櫈。
其實無諗過樂園附近會有咁既地方，因為起橫琴口岸搭車入去，沿路感覺幾荒蕪，無咩人，所以都算有小驚喜。
因為我係雞翼控，見有雞翼串燒，口痕就食返串。
最想推介嘅係一間叫十七世紀Royal Tea(唔係好記得個名) 杯水果茶RMB￥25，唔會好甜，仲有水果起入面，飲完仲可以食埋，感覺好fresh。
另外，起賣野飲隔離叫左個蛋包飯，好平大約RMB￥20，本身驚中伏，話晒咁平又係大陸，點知又一個小驚喜！蛋包飯入面係西炒飯，仲有d肉碎、粟米粒咁，味道仲好過酒店個炒飯，不過掛住食唔記得影相！間野仲有好多野食，墨西哥卷都唔錯！ 有時間可以搭兩個站出黎食。
夜晚去橫琴島劇院睇馬戲，我地雖然係坐第一行，但係坐台側。如果坐正台中間，就可以同表演者有互動。
節目都幾豐富，有動物、飛車、馬戲雜技等，都睇咗1.5 – 2 hrs。
第二日就去左海洋王國，以為好細，點知同海洋公園一樣咁大！我地起酒店搭shuttle去，12點幾入到去玩唔晒就要走啦，諗住hea玩，點知最後好趕！
分左唔同區，我地沿路玩，都有唔少機動遊戲，不過我就本身好驚離心力，起海洋公園玩哥架搖擺船都好驚，所以今次淨喺玩咗「海象山」入面嘅超級激流已經覺得夠晒本！本身諗住咁熱就濕下身，不過我最後玩咗兩次，見都OK玩到就唔好蝕底。
個超級激流喺一架列車嘅形式，最特別係上到最高點會倒轉，姐喺向後衝返落去，哥一下，全車人都好驚咁大叫「唔喺掛」。第一次我坐最前(倒轉完衝落去哥陣會變咗最後)，第二次我就試下坐最後，坐最後其實驚好多！同埋第二次知道玩法之後就開始笑其他人。
之後集中睇動物同魚，其實種類多過海洋公園。小朋友玩唔到機動遊戲都大把野睇！最重要一點喺，個樂園其實唔算多人，唔會感覺好迫。
除左北極熊，仲有雪狐嫁！
有d似新加坡SEA海洋館
其實計返買套票好似抵d，因為海洋王國同橫琴島劇院入場要RMB￥380一個人，酒店又要千幾蚊，船票又無左幾百，套票平均都係一千蚊一個人，仲包一張門票，包埋碼頭接駁巴士到長隆！唔想住橫琴灣仲可以住企鵝 / 馬戲酒店，相對橫琴灣仲平！企鵝 / 馬戲酒店起海洋王國隔離，可以搭shuttle去橫琴灣酒店。想近近地玩兩日可以去下！
