自從啟德遊輪碼頭開幕之後，坐遊輪好似都唔係咁遠嘅事。
依家仲有亞洲本土豪華遊輪加入戰團，去幾日旅行都多咗個選擇。今次就為大家直擊報告星夢郵輪旗下全新下水嘅雲頂夢號住唔住得過先！
啟航典禮當日由醒獅環節揭開序幕，大家一見到郵輪真身都嘩嘩聲，表示好驚嘆。
只因郵輪總共有18層甲板，德國製造，有成15萬噸以上，喺你面前望上去真係好震撼！
另外不得不提船身設計係由中國波普藝術家蔡贇驊創作嘅「尋愛．啟航夢之旅」藝術品，講述美人魚同太空人嘅愛情故事，顏色夠哂豐富。
登船之後就來到可以容納一千人嘅星座劇院進行簡單儀式同欣賞「尋愛．啟航夢之旅」為主題嘅表演。
硬件包括座位，燈光，聲效都達到專業水平，聽講啟航後仲可以欣賞到3D電影同埋海上版《星夢傳奇—中國達人秀》。
午餐方面就試咗船上其中一間免費餐飲選擇 – 麗都自助餐廳。
食物選擇比較少同埋普通，味道亦唔算好出眾，但船員非常友善，主要講普通話或英文。
之後就由船公司職員帶我哋行下雲頂夢號，由於呢隻郵輪實在太大，上上落落行咗個幾鐘都未行到一半，以下簡短介紹一下船上各類設施。
1. 客房
雲頂夢號有70%都係露台房，仲有超過100間相連房間，方便一家出遊嘅時候入住。
以3日2夜香港、海上巡遊套票計，淡季嘅露台客房都係做緊限時優惠每人$2,499起，呢口價絕對住得過。
想住豪啲可以加多兩，三千蚊住套房。船上總共有142間套房，每房都會有私人管家24小時為你服務。
房入面嘅無線電話仲可以讓你隨身攜帶於船內每個角落，直接致電你嘅私人管家或者聯絡同樣住其他套房嘅朋友，係方便嘅。
除此之外，套房住客仲可享私人日光甲板、泳池同雲頂俱樂部嘅各項設施同餐廳，好似自己獨佔一個resort咁架！
2. 美容養生
Spa Centre我諗每個女仔都最關注，正如男仔會關注gym room一樣。
因為係新船，地方新淨整齊之餘仲好寬敞，同知名連鎖酒店Spa有得比，價錢仲要平啲，$500左右已經有75分鐘水療 + 熱石按摩。
另外仲有剪髮、美甲、男士護理、醫療服務等等，都幾周到。
3. 娛樂設施
基本設備如卡拉OK、賭埸、酒吧就不在話下，連夜光保齡球場同麻雀室都有，真係夠哂貼地。
而酒吧都有分開香檳吧、雞尾酒廊、360吧 (覆蓋三個樓層連現埸表演)，就算你專一到只係飲Johnny Walker都有佢地專屬海上酒吧，仲可以即場刻上自己個名。
想購物一樣無問題，簡直係將成個大型商場嘅化妝品同國際牌子專櫃搬哂上船。
可以碌卡，又或者喺船上ATM撳錢都好方便。
4. 戶外康體設施
另一個坐郵輪嘅重頭節目當然係戶外設施啦。
一上到主泳池甲板就會見到5條成人滑梯喺船嘅兩邊，旁邊仲有個兒童嬉水樂園同埋按摩池。
唔想玩水的話，仲有繩索、攀石、迷你高爾夫、緩步跑、籃球等等，全部都位於最開揚嘅上層甲板，望住最開揚嘅海景，做運動都特別有精神！
Zouk海灘派對俱樂部可以開放預訂私人甲板舉行狂歡Party，邀請DJ負責現場音效或者好Chill咁喺星空下睇電影同樣無問題。
星夢郵輪仲會每週安排一次煙花匯演，咁近距離喺海上觀賞煙花大概人生都無幾多次機會。
5. 餐飲
船上有三間免費餐廳︰星夢軒 (亞洲菜/ 素菜)、雲頂宮 (中菜)、麗都自助餐廳 (多國菜)。
當中雲頂宮更提供戶外火鍋，係好嶄新嘅意念，完全照顧到香港人口味。
其他自費餐廳亦有提供日式鐵板燒、名廚主理菜式、戶外燒烤、24小時餐飲等等。
連突然想飲杯珍珠奶茶都有出售台式飲品嘅茶驛站幫到你，非常切合亞洲人需要。
6. 其他
商務設施例如會議室、4種語言即時傅譯服務、付費Wi-Fi都一應俱全，考慮到公司活動或商務客人嘅需求。
而講到雲頂夢號最創新嘅賣點就一定係郵輪配備嘅兩艘先進海底觀光器，可以深入海底世界作最親密接觸，衝擊視覺體驗，連小編我都非常心動想參加！
總括雲頂夢號各項配套設備都係非常人性化同埋專為亞洲人而設，雖然航線暫時都係香港、越南同新加坡，但想體驗一下亞洲郵輪魅力就唔可以錯過啦！
官網︰http://www.dreamcruiseline.com/tc/
查詢價格及詳情︰
香港、海上巡遊3天豪華郵輪船票
http://www.wingontravel.com/Cruises/TourResultDetail/HDH03QA.html
香港、越南(峴港、下龍灣) 6天豪華郵輪假期
http://www.wingontravel.com/Cruises/TourResultDetail/HDH06A.html
新加坡、越南(胡志明、芽莊、峴港)、香港 7天豪華郵輪假期
http://www.wingontravel.com/Cruises/TourResultDetail/SDH07D.html
