講起櫻花雖然會比較容易聯想到日本，但韓櫻的勢力同樣不容忽視，
就好似韓劇都好興加插櫻花場景去營造浪漫氣息，之後就當然令一眾劇迷心癢癢想去親身感受下啦。
今次同大家一路向北，從最早開花的濟州島開始追櫻之旅！
(來源︰韓國旅遊及文化體驗中心)
1. 濟州島 – 典農路
濟州島位於韓國南部，氣溫最早回暖，櫻花自然亦係全國最早開花。
而且三月正值係濟州島開滿油菜花的時候，咁就可以同時兩者兼得，一次旅行兩種享受。
濟州最有人氣的櫻花大道就正正位於典農路，就近濟州競技場，每年4月初櫻花盛開的時候就會舉辦文化節，有各種民俗表演、展覽同小食，一齊同歡。
綻放時期︰24/3/2017 – 8/4/2017
地址︰濟州特別自治道濟州市二徒一洞
交通︰濟州市搭乘經由客運站的市區公車 – 濟州市外巴士客運站下車
2. 慶尚南道 – 鎮海
鎮海櫻花係韓櫻當中最有代表性的。
而固定於4月初舉行的鎮海軍港節，每年吸引大約200萬名以上的遊客嚟朝聖。慶典期間會有軍樂儀隊慶典、煙火大會等等，非常熱鬧墟冚。
而最強打卡位就一定係余佐川橋同慶和車站，風吹過仲可以感受到陣陣櫻花雨。
綻放時期︰26/3/2017 – 10/4/2017
地址︰慶尚南道昌原市鎮海區中原圓環等
交通︰從釜山老圃、沙上、東萊搭乘前往鎮海的市外巴士
3. 釜山 – 南川洞
南川洞其實係個小社區，周邊都係住宅，但亦因為咁就成為好多釜山人春季必到的賞櫻地點。
一到櫻花滿開時，成個小社區的道路都化身成櫻花大道，一直行就會到達「廣安里海水浴場」。晚上的夜櫻搭配海景更加令人心醉。
綻放時期︰26/3/2017 – 10/4/2017
地址︰釜山水營區
交通︰地鐵金蓮山站5號出口，徒步約10分鐘
4. 大邱 – E-world
有人對夜櫻情有獨鍾嗎？咁大邱的E-world一定係你杯茶。
因每年E world都會舉辦星光櫻花節，已經成為市內非常有名氣的夜櫻景點。
除咗有滿足大小朋友的遊樂設施，還有滿開櫻花搭配瀑布同燈光，真係幾夢幻！附近仲有大邱塔可以高空欣賞呢個燈光盛會。
綻放時期︰27/3/2017 – 12/4/2017
地址︰大邱廣域市達西區頭流公園路200 (頭流洞)
交通: 大邱地鐵2號線頭流站，徒步約五分鐘
5. 首爾 – 汝矣島
首爾最熱爆的賞櫻勝地必數汝矣島，總長達1.7公里長的櫻花道，種有1400棵櫻花樹。由於受光位置唔同，花期會長至兩星期，咁就唔怕撲空啦。
櫻花節期間仲有各式攤檔同表演，非常熱鬧。留到晚上會有配上燈光效果的夜櫻，同樣吸睛。
綻放時期︰2/4/2017 – 18/4/2017
地址︰首爾特別市永登浦區國會大路 (汝矣島洞)
交通︰汝矣島站1號出口、國會議事堂站1號出口
6. 首爾 – 慶熙大學
慶熙大學的建築風格走哥德式路線，經常入選韓國最美學府之一，而櫻花季時就更加被遊客鎖定為書卷味最重的賞櫻勝地。
從大學正門口到本館的一路上都有櫻花樹綻放，形成一條櫻花隧道，為校園增添更多浪漫青春氣息。
綻放時期︰2/4/2017 – 18/4/2017
地址︰首爾市東大門區回基洞 1號
交通︰回基站1號出口
