第一次去長隆，出發前上網搵料，本身都唔知經九洲港去定經澳門去好，其實仲有諗過起香港搭直通巴士(呢個要吽大約兩個半鐘巴士)。但係最後都揀左經澳門去，因為心諗去程或者回程可以起澳門食下野(最後係無時間咁做嘅)！
尖沙咀中港城 > 金光飛航 > 澳門氹仔碼頭 > shuttle bus > 威尼斯人 > 的士 > 蓮花口岸 > 接駁車 > 橫琴口岸 > 公車K11 > 橫琴灣酒店
香港 > 金光飛航 1.25 hrs > 澳門
澳門新碼頭勁大，其實個碼頭好空，咩都無，行出去搭車反而變得遠左。本身諗住搭的士去蓮花口岸，條隊就長啦，但的士就一架都無！改搭shuttle bus去威尼斯人，再轉的士。
威尼斯人shuttle bus > 的士 (HK$30) 10 mins > 蓮花口岸
d shuttle bus好集中，對比以前好咗好多，等shuttle bus位置仲要有蓋，勁曬或者落雨都唔怕。
到左威尼斯，其實都已經13:30，本身諗住賭返兩手，最後都係直接轉的士去蓮花口岸。過關一個人都無！勁正！一個字「快」！過蓮花口岸係用身分證嫁！我個friend比左回鄉證，人地問佢拎身分證！
蓮花口岸 > 不知明接駁巴士 (RMB￥5) 5 mins> 橫琴口岸
過完蓮花口岸一出去就有個牌寫住去橫琴口岸，我地企起到等左2分鐘，突然隔離線有架巴士出現，個司機仲叫我地過去，佢話一樣都係去橫琴口岸。哥陣仲驚驚地，會唔會車左我地唔知去邊！我地問佢幾錢，佢仲話唔洗錢！到左落車哥陣又大叫每人5蚊！(不過之前上網睇都係話程車要收5蚊嘅)
橫琴口岸就係時候要用回鄉證啦！都係一個人都無，星期六喎！
橫琴口岸 > 公車K11 (RMB￥3) 15mins > 橫琴灣酒店
一出就見到公車站，個站都好大下，除左K11，仲可以搭K10同86，都會去橫琴灣酒店，尾站係長隆。因為我住橫琴灣酒店所以就去左酒店先。
另外，公車路線圖有個站叫 橫琴客運碼頭，勁多野食嫁！有興趣可以睇下一篇介紹。
Ps 回程起威尼斯人見到原來有shuttle bus去蓮花口岸
