返工無非都係想去更多嘅旅行，與其係香港打份牛工日望夜望，好多人寧願選擇去異地打工渡假，趁仲有青春享受邊玩邊賺錢嘅時光。
而澳洲就係眾所周知嘅天堂，門檻低收入高環境好，簡直同「高富帥」一樣咁好package！
名額限制︰無上限
年齡限制︰18-30
經濟證明︰5,000澳幣（約30,000港元）
逗留期︰12個月﹝二簽可再停留12個月﹞
最低工資：每小時16.87 澳幣（約100港元）
有關申請詳情︰http://www.border.gov.au/Trav/Visa-1/417-#
事實又係咪真係咁呢？拆解以下5大迷思就知啱唔啱你啦。
1. Working holiday可以避世？
每個人去working holiday嘅原因都唔同，有人想體驗生活識朋友，有人想去旅行見識更多… 說穿了都係想離開香港，避一避世。
無可否認澳洲係一個唔錯嘅選擇。澳洲係世界上人口密度最低嘅國家，天然資源非常豐富。
尋求刺激好玩可以嘗試skydiving、潛水。探索大自然又有大堡礁、袋鼠島、古熱帶雨林等等。
重點係澳洲人都好著重work-life balance，工作過後亦應玩樂一番，對比香港長期受壓嘅環境的確係世外桃源。
2. 只可以做勞動工作？
靜靜雞話你知，其實澳洲政府推動年輕人參加工作假期計劃原意係希望可以填補一些勞動性空缺，
因為本地人大多唔願意做，所以最容易搵到嘅工種類型都偏向係農場、餐飲、酒店執房等等。
雖然遍地都係呢類型嘅工，但只要你英文流利，其實都可以試下搵商場售貨員、coffee shop (可能需要咖啡師牌照，但有部分僱主願意低薪俾你邊學邊做) 。
Seek – 澳洲本地最大既求職網︰www.seek.com.au
Gumtree – 一站式找工作、房屋、汽車 ︰http://www.gumtree.com.au/
3. 一年收入夠返香港買樓？
聽第一代師兄講，如果你唔係大花筒又唔係瘋狂豪遊，好多人都袋住幾十萬返香港即刻可以上車。
當然樓價都已經今時唔同往日，但幾十萬呢支歌仔又有無得繼續唱呢？
首先update返大家一個sad news，就係澳洲政府今年就外籍打工渡假嘅背包客將會徵收32.5%重稅！
不過由於反對聲音非常大，政府已經確認調低至19.5%。
換句話講，就算你搵到絕世好工有20澳幣一個鐘，一星期標準工時38，距離首期……你懂的！
最新稅率新聞︰http://std.stheadline.com/daily/news-content.php?id=1483134&target=2
4. 係咪個個都會環島遊先返?
一年話長唔長，話短唔短。莫講話環島遊，要遊到半個澳洲都唔易，當中牽涉到budget同時間分配。
其實可以首先列個清單篩選咗最想去嘅地方先，再開始搵同伴一齊計劃旅程。
小編嘅朋友就比較好動，所以佢嘅目標就係自駕遊西澳，玩攀岩，玩探險，有時為左慳錢仲會直接喺架車入面瞓。
但記住去到幾盡都好，記得確保有個國際車牌同埋買定旅遊保險，依家有啲保險公司已經推出working holiday專用保險計劃，可以留意返。
澳洲旅遊局︰http://www.australia.com/zh-hk
5. 回港後要還原基本步?
話就話避世啫，唔係搵到頭家，都係要面對現實返香港繼續捱世界。
根據非正式統計，如果你唔係專業人士，有返一個半個牌旁身，被壓價嘅機會高於8成。
僱主普遍比較現實，唔單止澳洲1/2年唔當工作經驗，反而會覺得你未必跟得上市場步伐同埋容易有錯覺認為你貪新鮮感，未玩夠。
唔想被定型就可以係面試時盡量表現自己其實係鍾意挑戰自我，肯學肯做，或者投身創意工業都係一個唔錯嘅選擇，唔好局限自己就得啦！
